கேரள மாநிலத்தில் ஓணம் பண்டிகை மிகச்சிறப்பாக கொண்டாடப்படும் பண்டிகை. இந்த பண்டிகைக்காக கேரள மாநிலத்தில் கிட்டத்தட்ட ஒருவாரம் விடுமுறை அளிக்கப்படும். தமிழகத்திலும், குறிப்பாக சென்னையில் ஏராளமான மலையாளம் மொழி பேசும் கேரள மாநிலத்தை சேர்ந்தவர்கள் பல ஆண்டுகளாக வாழ்ந்து வருவதால், அவர்களும் ஓணம் பண்டிகையை சிறப்பாக கொண்டாடும் வகையில் சென்னையில் ஓணம் பண்டிகையின் முக்கிய நாளான வரும் 28ஆம் தேதி அன்று உள்ளூர் விடுமுறையாக சென்னை மாவட்ட ஆட்சியர் அறிவித்துள்ளார்.
இது குறித்து சென்னை மாவட்ட ஆட்சியர் எ.சுந்தரவல்லி அவர்கள் நேற்று வெளியிட்ட செய்திக்குறிப்பு ஒன்று கூறுவதாவது: ‘‘ஓணம் பண்டிகையை முன்னிட்டு ஆகஸ்ட் 28-ம் தேதி வெள்ளிக்கிழமை சென்னை மாவட்டத்துக்கு உள்ளூர் விடுமுறை அளிக்கப்படுகிறது. இதற்குப் பதிலாக வரும் செப்டம்பர் 19-ம் தேதி சனிக்கிழமை சென்னை மாவட்டத்தில் உள்ள அனைத்து அரசு அலுவலகங்கள், கல்வி நிறுவனங்களுக்கு பணி நாளாக அறிவிக்கப்படுகிறது. அவசர அலுவல்களை கவனிப்பதற்காக கருவூலம், சார்நிலை கருவூலங்கள் ஓணம் தினத்தன்று செயல்படும்’’
இவ்வாறு சென்னை மாவட்ட ஆட்சி தலைவர் எ.சுந்தரவல்லி தனது செய்திக்குறிப்பில் தெரிவித்துள்ளார்.
English Summary : Local holiday in Chennai on 28th August due to Onam festival.