சென்னை உள்பட தமிழகம் முழுவதும் கடந்த சில நாட்களாக தொடர்ந்து கனமழை பெய்து வருவதால் இன்று நடைபெறுவதாக இருந்த செமஸ்டர் தேர்வுகள் தள்ளிவைக்கப்படுவதாக சென்னை பல்கலைக்கழகம், அண்ணா பல்கலைக்கழகம், திருவள்ளுவர் பல்கலைக்கழகம், சட்ட பல்கலைக்கழகம் ஆகியவை அறிவித்துள்ளன.
சென்னை அண்ணா பல்கலைக்கழக பதிவாளர் எஸ்.கணேசன் நேற்று செய்தியாளர்களிடம் கூறியபோது, “தொடர் மழை காரணமாக, 16-ந் தேதி திங்கட்கிழமை முதல் 18-ந் தேதி வரை நடத்தப்படவிருந்த தேர்வுகள் ஒத்திவைக்கப்படுவதாகவும், மறு தேதி பின்னர் அறிவிக்கப்படும் என்றும் தெரிவித்தார்.
இதேபோல், மழை காரணமாக, 16ஆம் தேதி நடைபெறுவதாக இருந்த அனைத்து தேர்வுகளும் ரத்து செய்யப்படுவதாகவும் புதிய தேதி பின்னர் அறிவிக்கப்படும் என்று சென்னை பல்கலைக்கழகத் துணைவேந்தர் பேராசிரியர் ஆர்.தாண்டவன் தெரிவித்தார்.
நவம்பர் 16 மற்றும் நவம்பர் 17 ஆகிய இரு தேதிகளில் நடைபெறுவதாக இருந்த தேர்வுகள் ரத்து செய்யப்பட்டுள்ளன. மறு தேதி பின்னர் அறிவிக்கப்படும் என்று திருவள்ளுவர் பல்கலைக்கழக பதிவாளர் அமுல்தாஸ் தெரிவித்தார்.
இன்று நடைபெறுவதாக இருந்த தமிழ்நாடு டாக்டர் அம்பேத்கர் சட்டப் பல்கலைக்கழக செமஸ்டர் தேர்வுகள், கனமழை காரணமாக தள்ளிவைக்கப்படுவதாகவும் மறு தேதி பின்னர் அறிவிக்கப்படும் என்றும் அதன் துணைவேந்தர் பேராசிரியர் பி.வணங்காமுடி தெரிவித்தார்.
english summary-semester examinations postponed