சென்னையின் மிகவும் நெருக்கடியான பகுதிகளில் ஒன்று தி.நகர் என்பது அனைவரும் அறிந்ததே. குறிப்பாக மாம்பலம் ரயில் நிலையத்தில் இருந்து தி.நகர் பேருந்து நிலையம் வரை செல்லும் பொதுமக்கள் பெரும் இடிபாடுகளுக்கு இடையே மிகவும் கஷ்டப்பட்டு செல்லும் சூழ்நிலை உள்ளது. இதனால் பொதுமக்களின் நீண்ட நாள் கோரிக்கையை ஏற்று மாம்பலம் ரயில் நிலையம் முதல் தி.நகர் பேருந்து நிலையம் வரை ஆகாய நடைபாதை அமைக்க விரிவான திட்ட அறிக்கை தயார் செய்யும் பணி நடைபெற்று வருகிறது.
ஆகாய நடைபாதை பணிகள் விரைவில் தொடங்கப்பட உள்ள நிலையில் இதுகுறித்து பொதுமக்களின் கருத்துக்களை தெரிந்து கொள்ள “பொதுமக்கள் கருத்துக் கேட்புக் கூட்டம்” இன்று நடைபெற உள்ளதாக சென்னை மாநகராட்சி அறிவித்துள்ளது.
இன்று மாலை 4 மணிக்கு சென்னை மாநகராட்சியின் ரிப்பன் கட்டட வளாகத்தில் உள்ள பொன்விழா அரங்கில் நடைபெறவுள்ள இந்த கருத்துக் கேட்பு கூட்டத்தில் பொதுமக்கள் கலந்து கொண்டு ஆகாய நடைபாதை குறித்து தங்கள் கருத்துக்களை தெரிவிக்கலாம் என்று சென்னை மாநகராட்சி அறிவித்துள்ளது. தி.நகர் பகுதி பொதுமக்கள் இந்த கூட்டத்தில் ஆர்வத்துடன் கலந்து கொள்வார்கள் என எதிர்பார்க்கப்படுகிறது.