புனித கங்கை நீர் சென்னை தபால் நிலையங்களில் விற்பனை செய்யப்படும் என கடந்த சில நாட்களுக்கு முன்னர் அறிவிக்கப்பட்ட நிலையில் சென்னை அண்ணாசாலை தலைமை தபால் அலுவலகத்தில் இன்று முதல் புனித ‘கங்கை நீர்’ விற்பனை தொடங்கவுள்ளதாகவும் இதன் விலை 200 மில்லி பாட்டில் ரூ.15 என்று நிர்ணயம் செய்யப்பட்டுள்ளதாகவும் தபால் நிலைய அதிகாரிகள் தெரிவித்துள்ளனர்.
தபால் அலுவலகங்களில் தபால் பட்டுவாடா, சேமிப்பு கணக்குகள் தொடங்குவது மட்டும் அல்லாமல் பொதுமக்களுக்கு சேவை அளிக்கும் வகையில் செல்போன் மற்றும் வீட்டு உபயோகப் பொருட்கள் உள்பட பல்வேறு பொருட்களின் விற்பனையும் நடந்து வருகிறது. இந்த வரிசையில் தற்போது புனித ‘கங்கை நீர்’ விற்பனையும் தொடங்கவுள்ளது. கங்கையில் புனித நீராடுவதை இந்துக்கள் வாழ்க்கையில் கிடைத்த பெரும் பாக்கியமாக கருதுகின்றனர். இவர்களுக்கு ஒரு வரபிரசாதமாக தபால் அலுவலகங்களிலேயே புனித ‘கங்கை நீர்’ விற்பனை திட்டம் தொடங்கப்பட உள்ளது. இந்த திட்டம் இந்துக்கள் மத்தியில் ஒரு நல்ல வரவேற்பை பெற வாய்ப்பு உள்ளதாக கூறப்படுகிறது.
இதுகுறித்து சென்னை வட்ட தபால் துறை தலைவர் மெர்வின் அலெக்சாண்டர் நேற்று செய்தியாளர்களிடம் கூறிகையில், “தபால் அலுவலகங்களில் பாட்டில்களில் புனித ‘கங்கை நீர்’ விற்பனை செய்யும் திட்டத்தை மத்திய சட்டம் மற்றும் நீதி, மின்னணு மற்றும் தகவல் தொழில் நுட்பத்துறை மந்திரி ரவிசங்கர் பிரசாத், மத்திய தகவல் தொடர்பு துறை மந்திரி மனோஜ் சின்ஹா ஆகியோர் பீகார் மாநில தலைநகர் பாட்னாவில் தொடங்கிவைத்து உள்ளனர்.
இந்த திட்டத்தின் மூலம் ரிஷிகேஷ் மற்றும் கங்கோத்திரி ஆகிய இரு இடங்களில் இருந்து 200 மற்றும் 500 மில்லி பாட்டில்களில் புனித கங்கை நீர் அடைத்து நாடு முழுவதும் உள்ள தபால் அலுவலகங்களில் விற்பனை செய்யப்படுகிறது.
ரிஷிகேசில் இருந்து வரும் 200 மில்லி பாட்டில் ரூ.15-க்கும், 500 மில்லி பாட்டில் ரூ.22-க்கும் விற்பனை செய்யப்படுகிறது. இதேபோன்று கங்கோத்திரியில் இருந்து வரும் 200 மில்லி பாட்டில் ரூ.25-க்கும், 500 மில்லி பாட்டில் ரூ.35-க்கும் விற்பனை செய்யப்படுகிறது.
நாடு முழுவதும் உள்ள தபால் அலுவலகங்களுக்கு தேவையான கங்கை நீர் பாட்டில்களில் அடைக்கும் பணியில் உத்தரகாண்ட் தபால் வட்ட அதிகாரிகள் ஈடுபட்டு வருகின்றனர். இந்த பாட்டில்கள் சென்னை அண்ணாசாலை தபால் அலுவலகத்தில் இன்று (செவ்வாய்க்கிழமை) முதல் விற்பனை தொடங்குகிறது. தொடர்ந்து தமிழகத்தில் உள்ள 94 தலைமை தபால் அலுவலகத்திலும் ஒரு வாரத்தில் கிடைப்பதற்கான நடவடிக்கைகள் எடுக்கப்பட்டு வருகிறது. வரவேற்பை பொறுத்து அனைத்து தபால் அலுவலகங்களுக்கும் விரிவுபடுத்தவும் வாய்ப்பு உள்ளது.இவ்வாறு அவர் கூறினார்.
English Summary :The holy water of the Ganga Sales in chennai anna salai post office Starts today