இளையதளபதி விஜய் நடித்த ‘புலி’ திரைப்படம் வரும் அக்டோபர் 1ஆம் தேதி ரிலீஸ் ஆகும் என அதிகாரபூர்வமாக அறிவிக்கப்பட்டதை அடுத்து ஏற்கனவே இந்த படம் ரிலீஸ் ஆகும் என கூறப்பட்ட செப்டம்பர் 17ஆம் தேதியில் சிவகார்த்திகேயனின் ‘ரஜினிமுருகன்’, ஜி.வி.பிரகாஷின் ‘த்ரிஷா இல்லைனா நயன்தாரா’, நயன்தாராவின் ‘மாயா’, மற்றும் கவுண்டமணியின் ’49 ஓ’ ஆகிய படங்கள் ரிலீஸ் ஆகின்றன.
மேலும் விஜய் படம் அக்டோபர் 1ஆம் தேதி ரிலீஸ் ஆகவுள்ளதால் அக்டோபர் 2ஆம் தேதி ரிலீசாகும் என அறிவிக்கப்பட்டிருந்த ஆர்யா-அனுஷ்காவின் ‘இஞ்சி இடுப்பழகி’ திரைப்படம் அக்டோபர் 16ஆம் தேதிக்கு தள்ளி வைக்கப்பட்டுள்ளது. இந்நிலையில் எந்தவித போட்டியும் இன்றி ‘புலி’ படம் பிரமாண்டமாக ரிலீஸ் ஆகும் என அனைவரும் எதிர்பார்த்த நிலையில் திடீர் திருப்பமாக விஜய் சேதுபதி – நயன்தாரா நடித்த ‘நானும் ரெளடிதான்’ திரைப்படம் அக்டோபர் 2ஆம் தேதி ரிலீஸ் ஆகும் என அறிவிக்கப்பட்டுள்ளது. இந்த அறிவிப்பை படத்தின் தயாரிப்பாளர் தனுஷ் அறிவித்துள்ளார்.
விஜய்யின் படத்துடன் விஜய் சேதுபதி நடித்த படம் ரிலீஸ் ஆவது இதுவே முதல் முறை என்றபோதிலும் கடந்த 2014ஆம் ஆண்டு இதே அக்டோபர் மாதம் விஜய்யின் ‘கத்தி’ படத்துடன் விஷால் நடித்த ‘பூஜை’ படமும், அதே ஆண்டு ஜனவரியில் விஜய்யின் ஜில்லா படத்துடன் அஜீத்தின் வீரம் படமும் வெளியாகி, இரண்டு படங்களும் வெற்றி பெற்றது. அதுபோலவே இவ்வருடமும் விஜய், விஜய் சேதுபதி இருவரது படங்களும் அடுத்தடுத்து ரிலீஸ் ஆனாலும் இரு படங்களுமே வெற்றி பெறும் என எதிர்பார்க்கப்படுகிறது.
English Summary:Vijay’s Puli collides With Nanum Rowdydhan.