நடிகர் திலகம் சிவாஜி கணேசன் அவர்கள் ஆரம்பித்த ‘சிவாஜி புரடொக்ஷன்ஸ்’ என்ற படத்தயாரிப்பு நிறுவனம் பல வெற்றி படங்களை தயாரித்த நிலையில், தற்போது சிவாஜியின் பேரனும், சிவாஜியின் மூத்த மகன் ராம்குமாரின் மகனுமான துஷ்யந்த் ‘ஈஷான் புரொடக்ஷன்ஸ்’ என்ற தயாரிப்பு நிறுவனத்தை தொடங்கியுள்ளார். இந்த நிறுவனம் தயாரிக்கும் முதல் படத்தின் டைட்டில் ‘மீன் குழம்பும் மண் பானையும்’ என்று வைக்கப்பட்டுள்ளது. இந்த படத்தில் பிரபு முக்கிய வேடத்தில் நடிக்கவுள்ளார். இந்த படத்தை அமுதேஷ்வர் என்பவர் இயக்கவுள்ளார்.
இந்த படத்தின் பெரும்பாலான காட்சிகள் சென்னை மற்றும் மலேசியாவில் படமாக்கப்பட திட்டமிடப்பட்டுள்ளது. இந்த படத்திற்காக லொகேஷன் பார்க்க சமீபத்தில் மலேசியாவுக்கு தயாரிப்பாளர் துஷ்யந்த் மற்றும் இயக்குனர் அமுதேஷ்வர் சென்றிருந்தனர். அப்போது மலேசியாவில் ‘கபாலி’ படப்பிடிப்பில் இருந்த சூப்பர் ஸ்டார் ரஜினிகாந்த் அவர்களை நேரில் சந்தித்து தங்களது புதிய நிறுவனம் குறித்தும், புதிய படம் குறித்தும் தெரிவித்தனர்.
சிவாஜி புரொடக்ஷன்ஸ் நிறுவனம் போலவே இந்த புதிய நிறுவனமும் மென்மேலும் வளர வாழ்த்திய ரஜினிகாந்த், படத்தின் தலைப்பை கேட்டதும் இந்த படம் நிச்சயம் ஹிட் ஆகும் என ஆசி வழங்கினார். இந்த படத்தில் பிரபுவுடன் காளிதாஸ் ஜெயராம், ஆஷ்னா சவேரி, எம்.எஸ்.பாஸ்கர் உள்பட பலர் நடிக்கின்றனர். டி.இமான் இந்த படத்திற்கு இசையமைக்கின்றார்.English summary-Sivaji ganesan grandson movie