தென்னிந்திய நடிகர் சங்கத்தின் புதிய உறுப்பினர்களை தேர்வு செய்ய கடந்த சில மாதங்களுக்கு முன் நடைபெற்ற தேர்தலில் வெற்றி பெற்ற நாசர் தலைமையிலான அணி, நடிகர் சங்க உறுப்பினர்களுக்கு பல்வேறு நல்ல திட்டங்களை செயல்படுத்தி வருகின்றன. இவர்களின் தேர்தல் அறிக்கையில் குறிப்பிட்டிருந்த முக்கிய அம்சம் என்னவெனில், நடிகர் சங்கத்திற்கு என தனி கட்டிடம் கட்ட வேண்டும் என்பதுதான். இந்த கட்டிடம் கட்டுவதற்காக பல்வேறு வகையில் நிதி திரட்ட நடிகர் சங்கம் திட்டமிட்டுள்ளது. அதன் முதல்படியாக முக்கிய நடிகர்கள் கலந்து கொள்ளூம் ‘ஸ்டார் கிரிக்கெட்’ போட்டி நடத்துவது ஆகும்
இந்த போட்டியை சென்னை சேப்பாக்கம் கிரிக்கெட் மைதானத்தில் நடத்த சமிபத்தில் தமிழக கிரிக்கெட் சங்கத் தலைவர் ஸ்ரீனிவாசனை சந்தித்து அனுமதி பெற்ற நடிகர் சங்க நிர்வாகிகள் இந்த போட்டியை வரும் ஏப்ரல் 17 நடத்த திட்டமிட்டுள்ளனர். சென்னை சேப்பாக்கத்தில் நடைபெறவுள்ள இந்த ‘ஸ்டார்ர கிரிக்கெட் போட்டியில் சூப்பர் ஸ்டார் ரஜினிகாந்த், உலக நாயகன் கமல்ஹாசன், இளையதளபதி விஜய் உள்ளிட்ட முன்னணி நடிகர்கள் பலரும் பங்கேற்க உள்ளனர். முன்னணி நடிகர்கள் பலர் கலந்து கொள்வதால் இந்த கிரிக்கெட் போட்டிக்கு அதிகளவிலான ரசிகர்கள் கூட்டம் வரும் என எதிர்பார்க்கப்படுகிறது. எனவே இந்த போட்டி நடைபெறும் நாளில் காவல்துறை பாதுகாப்பு கேட்டு நடிகர் சங்கம் சார்பில் காவல் ஆணையர் அலுவலகத்தில் மனு கொடுக்கப்பட்டுள்ளது.
தென்னிந்திய நடிகர் சங்க தலைவர் நாசர் மற்றும் நிர்வாகிகள் சமீபத்தில் சென்னை பெருநகர காவல் ஆணையர் அலுவலகத்துக்கு வந்து, காவல் ஆணையர் டி.கே.ராஜேந்திரனை சந்தித்து ஒமனு ஒன்றை கொடுத்தனர். பின்னர் நிருபர்களிடம் நடிகர் சங்கத்தலைவர் நாசர் கூறியதாவது:
தென்னிந்திய நடிகர் சங்கத்துக்கு கட்டிடம் கட்ட நிதி திரட்டுவதற்காக நடிகர்கள் பங்கேற்கும் நட்சத்திர கிரிக்கெட் போட்டி நடக்கவுள்ளது. சேப்பாக்கம் கிரிக்கெட் மைதானத்தில் ஏப்ரல் 17-ம் தேதி இந்த போட்டி நடத்தப்படும்.
நடிகர்கள் கமல்ஹாசன், ரஜினிகாந்த் மற்றும் மும்பை, ஆந்திரா கர்நாடகாவில் இருந்தும் பிரபலமான நடிகர்கள் இந்த போட்டியை காணவும், போட்டியில் பங்கேற்கவும் வருகின்றனர். இப்போட்டிக்கு பாதுகாப்பு கொடுக்கும்படி காவல் ஆணையரை சந்தித்து மனு கொடுத்துள்ளோம்’ என்று கூறினார். .
இந்த போட்டி குறித்து நடிகர் ரமணா கூறும்போது, “ஸ்டார் கிரிக்கெட் போட்டி 6 ஓவர்களைக் கொண்டதாக இருக்கும் என்றும் காலை முதல் இரவு வரை நடத்தப்படும் இந்த போட்டியில் சுமார் 50 நட்சத்திரங்கள் போட்டியில் கலந்து கொள்ள இருப்பதாகவும், இந்த போட்டிக்கான டிக்கெட் கட்டணம் எவ்வளவு என்பதை இன்னும் முடிவு செய்யவில்லை’ என்றும் கூறினார்.
English Summary: On April 17, the South Indian Actors ‘Star Cricket’ competition. Sehwag takes place in Chennai.